Mikukvøldið 15. januar 2020 var lutakast um, hvussu spælast skal í undankappingini til eEURO2020, sum verður í London 9.-10. juli 2020.
Føroyska e-landsliðið í fótbólti varð bólkað saman við Wales, Ukraina, Andorra, Italia og Montenegro í bólki H. Bólkaspælið fer av bakkastokki í mars og heldur fram til mai.
Føroysku e-landsliðsleikararnir eru Heðin Skov og Virgar Trondesen, sum gjørdust ávikavist nummar 1 og 2 í FM-kappingini, sum varð hildin í e-fótbólti í november í fjør.
Virgar Trondesen og Heðin Skov, føroysku e-landsliðsleikararnir, sum koma at umboða Føroyar til #eEURO2020.
Italia, ið er ein stinn e-fótbóltstjóð, er óivað favorittur at vinna bólkin. Italska e-landsliðið er millum annað mannað av Ettore “Ettorito97” Giannuzzi, ið hevur myndað oddin í altjóða PES-league kappingini seinastu mongu árini.
Ettore “Ettorito97” Giannuzzi gjørdist yngsti heimsmeistari nakrantíð í 2011 og aftur í 2018. Í fjør gjørdist hann nummar 2.
Ettore “Ettorito97” Giannuzzi, tá ið hann gjørdist heimsmeistari í PES-league 2018. Ettore umboðar Italia í #eEURO2020.
Føroya Tele er høvuðsstuðul hjá føroyska e-landsliðnum í fótbólti. Her sæst lutakastið:
https://www.facebook.com/EURO2020/videos/1148150035576587/
