Starvsfólkatrivnaður

Hjá okkum á Føroya Tele eru dugnalig starvsfólk ein hornasteinur undir okkara virksemi, tí tey mynda okkara virksemi. At seta starvsfólkini í miðdeplinum og leggja dent á starvsfólkatrivnað er ein natúrligur partur av okkara gerandisdegi.

Í meira enn 110 ár hevur Føroya Tele tænt føroyingum, og føroyska fólkið hevur verið hjartaslátturin í fyritøkuni. Men pulsurin í dag er ein heilt annar, og føroyska fólkið setir heilt onnur krøv í einum heimi, sum broytist dag frá degi, og kappingin er ein natúrligur partur av gerandisdegnum. Harvið hevur Føroya Tele ábyrgdina av at taka pulsin og tryggja, at starvsfólkini trívast í skiftandi umstøðunum.

Dugnalig starvsfólk
Hóast Føroyar eru staddar úti á opnum havi, eru vit í dag eitt framkomið samfelag, har landamørk og frástøða ikki spæla stóran leiklut. Vit røkka runt knøttin akkurát sum einki.

Vit arbeiða miðvíst við at skapa eitt arbeiðsumhvørvi, har einstaka starvsfólkið er tilvitað um sín leiklut, og hvat verður væntað av teimum. Stevnumið okkara, sum er at tryggja, at starvsfólk trívast, eru motiverað og mennast, knýtir seg at okkara visjón at knýta Føroyar og føroyingar í eina betri framtíð.

Skulu vit ganga á odda í føroyska framburðinum, er raðfesting av starvsfólkatrivnaði ein fortreyt í mun til at tryggja ta góðskuni, ið kundin fær. Á hvørjum ári gera vit eina gjølla trivnaðarkanning og fáa greið úrslit, ið hjálpa okkum við miðvíst at skipa arbeiðið við starvsfólkatrivnaði.

Útbúgving og samstarv
Gjøgnum alt arbeiðslívið hjá einstaka starvsfólkinum eggja vit til áræði og ábyrgd við at virka fyri persónligari og fakligari menning. Um lívsumstøður hjá starvsfólkum og karmar hjá samtakinum geva grundarlag fyri tí, kunnu arbeiðskarmar skipast eftir ynski og tørvi hjá tí einstaka.

Vit miða støðugt eftir at skapa gjøgnumskygni í samtakinum, og kveikja áhuga fyri okkara kjarnuvirksemi og harvið knýta møgulig framtíðarstarvsfólk at fyritøkuni. Hetta gera vit millum annað við tøttum tilknýti til skúlar, lærustovnar og fyritøkur.

Vit síggja eina greiða synergieffekt í at hava lesandi í starvsvenjing hjá okkum. Umframt, at næmingar fáa møguleika at skriva serritgerðir við støði í virkseminum hjá Føroya Tele og harvið fáa ítøkiligar virkisroyndir, so uppliva vit ágóðan av, at okkara starvsfólk fáa innlit í nýggja gransking og nýggj ástøði, ið stuðla undir nýhugsan av verandi virksemi.

Trivnaður hægstu raðfesting
Í árligu trivnaðarkanningini skorar okkara arbeiðsgleði eitt indeksstig á 78 og trúfesti eitt indeksstig á 85. Hetta merkir, at arbeiðsgleðin og trúfestið hjá starvsfólkum á Føroya Tele er munandi omanfyri miðal á danska arbeiðsmarknaðinum og millum bestu fyritøkur í Norðurlondum. 97% av starvsfólkunum svaraðu navnloyndu kanningini í 2019.

Sannroyndin, at vit liggja so høgt, borgar fyri einum høgum starvsfólkanøgdsemi, sum ikki kemur av sær sjálvum. Miðvísa arbeiðið við trivnaðinum seinastu mongu árini ber nú blóma við sær.

Vit arbeiða áhaldandi við at varðveita og betra enn meira um arbeiðsgleðina. Hetta gera vit millum annað við javnan at raðfesta og samskipa tiltøk, ið samanumtikið leggja lunnar undir vitanardeiling, samstarv og menning.